[香港有素食] 銅鑼灣 | JIKKA燒雞

本地燒雞品牌開第四間分店，特別推出一版素食菜式，方便素食者出街食飯。前菜、沙律和意粉都以蔬菜為主，無落素肉。招牌熱狗就用炒蛋取代熱狗腸，估唔到都幾有驚喜。特別照顧唔食五辛嘅朋友，其中一款意粉就無肉無五辛，約朋友去試下啦。

+++++

+++++

JIKKA燒雞銅鑼灣店在利舞臺後面，位置都算就腳，門口設計獨特非常搶眼，行過都會想望下食咩。

入面座位唔算好多，裝修都延續活潑繽紛的感覺，牆上亦有特色藝術品點綴，據說當中有些是老闆的童年回憶。

餐廳雖然主打燒雞，但都做左成版素食選擇，誠意可加。不過留意返我去影的時候餐牌英文寫錯係 Vegan，實際應該蛋奶素為主，佢地話會改返，你可以望下新版有無改到。

香烤椰菜花、甜番薯配羽衣甘藍 HK$148

烤得好靚好入味的椰菜花，熟度剛剛好唔會太硬或太軟身，個醬亦很惹味，我可以自己食晒成個。

白味噌香焗茄子 HK$98

身為茄子愛好者這個必定要點，佢個白味噌醬都洽到好處，無死鹹。

墨西哥夾餅 HK$88

我以為夾餅是平面那種，做成卷狀也很好咬，而且味道有驚喜，入面滿滿牛油果和salsa，食落清新唔會飽滯。

經典狗(轉炒蛋) HK$98

熱狗也是餐廳的招牌菜式之一，素食版可以轉炒蛋，即係將條熱狗腸換成炒蛋。原本我都覺得有啲奇怪，不過炒蛋配茄汁芥末好好食，類似麥芝蛋的朋友。重點仲有超正焦糖洋蔥，任何包加焦糖洋蔥都特別好食。

秘製西班牙甜椒醬香菇意粉 HK$108

平時西式意粉好難避免要落洋蔥大蒜，不過這家餐廳因為跑馬地店常接待僧侶所以特別砲製了一款無五辛的西式意粉。佢個甜椒醬都整得勁好食，推介俾有宗教信仰的素友。

本以為燒雞店的素食都係果幾味，食完發現好有驚喜，食幾道菜全部好滿意，可以推介。

+++++

餐廳資料

JIKKA燒雞

地址：銅鑼灣希慎道2-4號蟾宮大廈地下8號舖

電話：91093196

營業時間： 11:30–22:30

+++++

相關文章