[邊度有素食] 觀塘 | EFG Eat for Green

其實觀塘區都有唔少素食，今次介紹一間主打素葷共融的小店，餐牌有一半係素食，跟非素食朋友食飯唔需要就來就去，人人都食得開心。甜品選擇都好多好吸引，價錢又平路過坐低下午茶或飯後甜品都唔錯㗎。

地點在方便就腳的駱駝漆大廈，晚上都唔少人行來行去找東西吃。

大約可以容納40人。裝修自然簡約風，唔會太逼都坐得舒服。

主食有近20款揀，當中有一半係素食，都幾有心思照顧素食者。

有飯有麵有漢堡有薄餅，菜式以西式為主。

甜品好多款揀，價錢都幾抵食，這天吃完都見到有人來吃飯後甜品。

原個南瓜燉飯HK$108

剛好遇上萬聖節，於是應節叫南瓜燉飯，好玩拍照又有趣的菜式。南瓜勁大個，入面可能有三四碗飯超誇張，黃色的飯香氣十足，尤其重芝士＆忌廉味，中間有些菇和玉米筍之類，食晒成個會勁飽，可以幾個人分享吃。

素超厚豬扒配溫泉蛋 白麵豉豆乳湯麵HK$98

厚豬扒可以配飯或湯麵，賣相非常吸引。白麵豉豆彩麵味道香濃，麵豉絕對無慳住用。超厚豬扒也很有驚喜，除了夠厚夠脆之外，味道吃起來有點像免治鹹牛肉，質感唔會太纖維感太韌，本身吃肉的朋友都覺得好吃。

「肉」質都唔錯，味道唔似麵筋果啲，肉食者都可以接受。

哈蜜瓜刨冰配香滑奶蓋 HK$78

甜品時間必吃刨冰系列，哈蜜瓜和菠蘿兩款都好吸引，粉粉波仔哈蜜瓜得意又方便食，賣相夠晒可愛。面頭一層奶蓋有點雲呢拿味，唔會太甜太膩，食落幾清爽。

泰奶麵包布甸 HK$62

入口即溶的麵包布甸，不用刀就可以吃完整份，配上特色泰奶、雪糕、OREO和焦糖香蕉，豐富又多元化。

餐廳資料

EFG Eat for Green

地址：觀塘開源道駱駝漆大廈3座3樓P室

電話：70742818

營業時間：12:00–21:30

IG： https://www.instagram.com/eatforgreen/